ジャズィー・ミャーク

仕事(すぐとぅ)まいしーだな あてぃ女性惚(みどぅんぶ)りやしー
酒(さき)ん溺(うぶ)りー家(やー)まい何(のー)まい売う゚ぃかいらし
飲(ぬ)みてぃ寝(に)っう゚ぃ また起(う)きてぃ飲(ぬ)み寝(に)っう゜ぃ
ぎっつぁしーらいん ふがましゃ 酒(さき)ふぁいや
人(ぴとぅ)んかいどぅなりゅう
ふぃーてぃか食(ふぉ)う ふぃーてぃか食(ふぁー)れん
ふぃーてぃか食(ふぁー)ん
食(ふぉ)うてぃかにゃーん
いーぎー まんてぃぬダスク生(ん)まりんかいなり
ダス゚ダス゚てぃ 色(いる)や刀刃(かたなばー) 酒(さき)や毒(どぅく)

海(いん)かい惚(ぶ)りす゚人(ぴとぅ)ぬどぅ
正惚(しょうぶ)り者(むぬ)てぃどぅあーす゚
寝(に)っう゚ゅーてぃまい 目覚(みす)りてぃまい
頭魚釣(かなます゚ふふぁ)す事(くとぅ)ばーき
ギャンブラーんかいなり つかいないうー牛(うす)まい売う゚ぃ
捨(し)てぃす゚人(ぴとぅ)まいうー
いし゚返(かい)らしまい止(や)みれーでぃが 後(あとぅ)や家(やー)ゆ
売(つこ)う゚てぃしまい
あーてぃか使(つこ)う あーだき使(つこ)う 借りてぃや使(つこ)う
銭(じん)ばーきどぅ使(つこ)う
あんしゅーさ゚海(いん)かい惚(ぶ)りるどぅます
魚(いす゚) 魚(いす゚てぃ
海惚(いんぶ)りどぅ 正惚(しょうぶ)り

ゆーぬすーや自分(どぅー)しとぅい食(ふぁ)いどぅ
ういがどぅ生き゚でぃいき゚道
昨日(き゚ぬ)がみぬくとぅや忘(ば)してぃまい
明日(あつぁー)からぬくとぅ投ぎやらん

他人(ぴとぅ)んな知(す)さーれたっふぁにゃん
癖(ふし)ゆあーさ゚れーてぃか
心病(き゚むや)ん 足痛(ぱずや)ん 腰痛(くすや)ん
首筋(ぬぶしや)がみまい痛み
癖(ふし)ぬ悪(ばす)かーがーら あらーからあーす゚
人(ぴとぅ)ぬどぅ悪(ばす)かーがーら
誰(とー)まい一(ぴてぃ)つや二つ
煮(に)るんまい食(ふぁー)れん癖(ふし)ゆどぅ持(む)ちーどぅー
家(やー)慣りどぅ 外(ぷか)慣りてぃどうあーず 人(ぴとぅ)ん馴りどぅ
世直(ゆーなう)りてぃまいあーす゜
便所んかい入し゚ちか鍵ゆかきる ジャッてぃ ジャッてぃ
癖(ふし)ゆ あっざいりばどぅ にたんむ

何(のー)まいあすだな 貰(もろ)うくとぅばーきゅ望(ぬず)んてぃかならん
畑(はり)の地(づー)ゆすきー 鍬(ふふぁつ)し土(んた)まいかじ
種(さに)ゆぽうりー
肥料(ふふぁい)まいふぃー 雨(あみ)ぬ振ふぁだか びょーすんな
水まいふぃー
自分(どぅー)が子(ふふぁ)を世話(みばか)すんだかり
毎日(まいにつ)ぴにつ汗(あし)ゆ出(い)だし
種(さに)ゆぽーりーどぅ実(みす゚) 育てぃるばどぅ
まさり生長(ぶどぅ)いぴす゜
粘(にんばー)りうるうしーだか何(のー)しゃーまい駄目(だみ)
ずーってぃ ずーってぃ 蒔き゚種(さに)ぬどぅ 穣(とぅ)らいす゚

ゆーぬすーや自分(とぅー)しとぅい食(ふぁ)いどぅ
ういがどぅ生き゚でぃいき゜道(んつ)
すぷたす゚服う 着しゅうてぃどぅ
美(か)ぎ服沢山(ふくたう)どぅ買(か)−れーす゚

太陽(てぃだ)ぬ沈(すず)みぴりば 憩(ゆく)うがつな 酒(さき)ゆ飲(ぬ)み
太陽(てぃだ)ぬ上がり来(き゚)すがみ 愛(かぬ)しゃが夢(いみ)が見い

何(のー)ばし金持(じんむ)ちゃやらばん
頭出来(かなまずでぃさ)うらばん
頑強(がんづう)し 人(ぴとぅ)ぬ世(ゆー)上手ん渡(ばた)りいかだか
頬(かまつ)ぬゆがみてぃまい
隣(となす゚)とゅゆがんなてぃ習(ならー)されー
親(うや)ぬあーし゚ゅーたー事(くとぅ)
しかてぃ肝(き゚む)ん染(す)み
腰(くす)ゆ持(む)たぎ
いつがみまい働(ぱたら)かでぃ
我(ば)や死(す)んがみ働(ぱたら)かでぃどー
うぃがどぅまんてぃぬ幸福(ぷからす)暮らすあらんな
ワイてぃ ワイてぃ
頑強(がんづう)さどぅ 一番(いつばん)
×